Երկուշաբթի, 22. 04. 2024

spot_img

Լիբանանի Ուսանողութիւնը Զարմացուց Բոլորը. Երիտասարդ Ցուցարարները Իրենց Ուշադրութիւնը Կեդրոնացուցին Պետական Հաստատութիւններուն Վրայ

Մինչ հակապետական ցոյցերը Լիբանանի մէջ պիտի  ամբողջացնեն իրենց երրորդ շաբաթը, յեղափոխականները նոր ռազմավարութիւն որդեգրեցին: Անոնք ակամայ ճամբաները բանալէ սկսան մէկը միւսին ետեւէն շրջապատել պետական հաստատութիւնները անդամալուծելով անոր աշխատանքները:

Հիմնականին մէջ համալսարանական ուսանողութենէ եւ դպրոցական աշակերտութենէ բաղկացած մեծ խումբեր սկսան Լիբանանի իիւրաքանչիւր շրջանի ու քաղաքի մէջ ընտրել մէկ կամ աւելի կեդրոններ, ու  անոր շրջակայքը հաւաքուելով իրենց բողոքի ցոյցերը կատարել:Կեդրոնական դրամատան մասնաճիւղը եւ շատ մը այլ հաստատութիւններ թիրախը դարձան արդէն իս 20 օրեայ անխոնջ ցուցարարական փորձարութիւնը ունեցած Լիբանանցի քաղաքականացած երիտասարդութեան:

Պէյրութի մէջ գտնուող Կրթական նախարարութեան կեդրոնատեղին, Արդարադատութեան պալատը,  Ելեկտրականութեան ընկերութեան շէնքը, վարչապետարանը, բջիջային հեռախօսի կեդրոնները- Թրիփոլիի քաղաքապետարանը, Նապաթիյյէյի Կեդրոնական դրամատան մասնաճիւղը եւ այլ հաստատութիւններ առաջին թիրախները հանդիսացան:

Այս աւելի քան յաջող փորձէն ետք ցուցարարները իրար հրաւիրեցին վաղը նոր հասցէներ պաշարել:

Մինչ այդ Համաշխարհային Պանքը ահազանգ հնչեցուց Լիբանանի տնտեսական իրավիճակին մասին եւ յայտնեց, որ վստահութիւն ներշնչող կառավարութեան մը կազմութիւնը անյետաձգելի է այլեւս:

Հաղորդուեցաւ, որ արտաքին գործոց նախարար Ժըպրան Պասիլ երէկ իր այս շաբթուայ երկար տեւող հանդիպումներէն երկրորդը տուաւ Վարչապետ Սաատ Հարիրիին: Այս այցելութիւնը եկաւ փաստելու, որ քաղաքական բարձր մակարդակի բակ դռներուն ետեւ ինչ, որ բան կ՛եփեն:

Ամէն պարագայի ժողովուրդը որոշած է մինչեւ ծայրը երթալ միանգամընդմիշտ լուծելով իրենց ապագան խթանող հարցերը, փոխանակ ժամանակաւոր դարմանումներ ընելու:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին