Չորեքշաբթի, 22. 05. 2024

spot_img

Շուշիի Ղազանչեցոց Տաճարին Մէջ Կնքուած Են Ապրիլեան Պատերազմի Զոհերու Հարազատները (լուսանկարներ)

ՆՈՐԱՅՐ ՅՈՎՍԷՓԵԱՆ

«Զարթօնք»ի Արցախի Աշխատակից

Ո’վ աւելի լաւ գիտէ անկախութեան իմաստն ու արժէքը քան անոր համար պայքարած ու զոհեր մատուցած ժողովուրդը: Իսկ այն ժողովուրդը, որ մեռնելու կարգին գիտէ նաեւ ապրիլ, ան չի մեռնիր:

Այն հողը, որ զոհուած Ռոպերթներու, Արմենակներու եւ Տիգրաններուն տեղ կը ծնի նոր քաջեր, ու մնացողները ի պատիւ ինկածներուն, երեխաներուն  կը կոչեն զոհուած հերոսներուն անուններով, մինչ զոհուածներուն Աստուած տակաւին ապրիլ պարգեւած ընկերները տէր կը կանգնին իրենց մարտական ընկերներուն զաւակներուն, այդ հողին իրաւունքն է անկախ ըլլալ… այդ հայրենիքը յաւերժ կ՛ապրի, իր զաւակներուն միջոցաւ, իր զաւակներուն համար:

«Խմբ.»

         Սեպտեմբերի 15-ին Շուշիի սուրբ Ղազանչեցոց տաճարին մէջ մկրտութեան մեծ արարողութիւն կազմակերպուած է: Մկրտուած են Ապրիլեան պատերազմին զոհուած հերոսներու հարազատները, պատերազմէն յետոյ ծնած եւ զոհուած տղոց  անունները կրող փոքրիկները: Կնքահայրերն ալ ապրիլեան պատերազմի մասնակիցներն են՝ շարքայինէն գնդապետ: Բոլորն ալ իրենց պարտքը կը  համարեն զոհուած մարտընկերներու ընտանիքներուն կողքին ըլլալը: Անոնք վստահ են, նոր, հոգեւոր կապը, առաւել քան իր նպատակին պիտի ծառայելէ՝ դառնալով նաեւ տասնամեակներու վրայ երկարող բարեկամութեան հիմքը:

Ապրիլ՝ չմոռնալով անոնց, որոնք մնացին ապրիլին մէջ: Ապրիլեան մարտական գործողութիւններու մասնակիցներու միութեան հռչակած նպատակն է: Անոր, որ ճակատագիրը խնայած է մարտի դաշտին մէջ, իր պարտքը կը համարէ զոհուած մարտընկերոջ ընտանիքի կողքին ըլլալ: «Որեւէ բան չկայ, որ կրնայ անոնց հուշերուն մէջէն ջնջել այդ ցաւը: Բայց մենք կրնանք թեթեւցնել այդ ցաւը՝ ըլլալով անոնց կողքին: Իրենց երեխաներու թիկունքին կրնայ կանգնիլ ապրիլեանի մասնակիցը՝ որպէս քաւոր, զոհուած  տղոց երեխաներուն, իսկ երեխաները մեր հարազատները, որպէս սանիկ»,- կ՛ըսէ Ապրիլեան մարտական գործողութիւններու մասնակիցների միութեան անդամ Շուլի Յակոբեանը:      Ճիշդ այդպէս ալ միութեան մէջ հասունացաւ գաղափարը, որ Ապրիլեան պատերազմի մասնակիցները դառնան նոյն պատերազմին զոհուած հերոսներու՝ հարազատներու, պատերազմէն յետոյ ծնած եւ զոհուած տղոց անունը կրող փոքրիկներու կնքահայրերը: Ռուբէն Մխիթարեանն ու ընկերներ ալ օգնեցին գաղափարը գործի վերածել: «Ես ու ընկերներս ուղղակի մէկ անգամ ալ ցոյց տուինք, Հայոց բանակին, պաշտպանութեան բանակին անդամ ինկած տղոց պէտք է յիշել ոչ թէ առիթից առիթ, այլ ամէն օր»,- բազմաթիւ օրերու չարչարանքը կարճ բանաձեւեց նախաձեռնութեան կազմակերպիչ Ռուբէն Մխիթարեան: Արդիւնքը Շուշիի Ղազանչեցոց եկեղեցուոյ մարդաշատ հրապարակն է: Ռոպերթ Ապաճեանի պապը կնքահայր չէ, բայց որոշած է անպայման ներկայ ըլլալ փոքրիկ Ռոպերթներուն մկրտութեանը…: Փոքրիկ Ռոպերթներէն մէկը Քաշաթաղի շրջանէն է: Երիտասարդ մայրը կը խոստուանի՝ իր 7-րդ երեխայի անունը որոշած էր այն ժամանակ, երբ տակաւին բժիշկները չէին ըսած՝ տղա՞յ կը ծնի, թէ աղջիկ: «Երազ եմ տեսել: Ինչը ճիշտ է՝ էդպէս եմ որոշել: Ամուսինս ասաց՝ ինչ գիտես, թող ծնուի՝ յետոյ: Ասացի՝ ես արդէն գիտեմ»,- պատմում է Արեւիկ Գրիգորեանը:

Իսկ գնդապետ Սահակեանի գիրկը զոհուած մարտական ընկերոջ՝ Դաւիթ Գասպարեանի դուստրն է:  «Մարիանան իմ գեղեցկուհին է, ու ես քաւոր եմ կանգնելու իրեն ու մինչեւ մեր գեղեցկուհին ամուսնանայ՝ բոլոր միջոցառումներին էլ պարտադիր մասնակցութիւն կ՛ունենամ»,- կը վստահեցնէ պահեստազօրի գնդապետ Գրիգորի Սահակեանը: Պատմութիւնները շատ են: Ղազանչեցոցի բակը լեցուն է հիւրերով ու անոնց պատմութիւններով: Բայց արդէն տաճար մտնելու ժամն է: 40 կնքահայրերը, 90 սանիկներու եւ անոնց ընտանիքներու անդամներուն հետ Ղազանչեցոց կը  մտնեն, ուր արդէն ամէն ինչ պատրաստ է պատասխանատու արարողութեան համար: Մեծ կնունքին նաեւ նախագահ Բակօ Սահակեանն ալ մասնակցեցաւ՝ Արցախի բարձրաստիճան պաշտօնեաներու ուղեկցութեամբ: Անոնցմէ շատերը նախկին ազատամարտիկներ են, 1990-ականներու պատերազմի ու Ապրիլեան պատերազմի մասնակիցներ:

Տաճարը, որ որպէս կանոն լուռ ու խորհրդաւոր կ՛ըլլայ ընդհանրապէս, լեցուած  է փոքրիկ Ռոպերթներու, Արմենակներու, Տիգրաններու ճիչ ու ծիծաղով: Այսպէս նոր պատմութիւններ կը ծնին, բարեկամական նոր կապեր կ՛ամրանան: Արցախի թեմակալ առաջնորդը օրուայ տօնական տրամադրութիւնը բնական կը համարէ:  Մարդոց միաւորողը պարզապէս կորուստի ցաւը չէ, այլ այդ ցաւը միասին յաղթահարելու ձգտումը: «Մկրտեցինք, խաչը կախեցինք հենց խաչուերացի տօնին, որ կրկնակի ուժեղ լինի եւ իրենք էլ դառնան հայրենիքի հզօր պաշտպան»,- օրուայ խորհուրդը կ՛ամբողջացնէ Պարգեւ արքեպիսկոպոս Մարտիրոսեանը:

Ստեփանակերտ

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին