Օգոստոսի 29-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց ՀՀ ԱԳՆ կենտրոնական ապարատի եւ օտարերկրեայ պետութիւններում ՀՀ դիւանագիտական ծառայութեան մարմինների ղեկավարների ամէնամեայ համաժողովի մասնակիցներին՝ առաջնորդութեամբ Հայաստանի Հանրապետութեան Արտաքին գործերի նախարար Զոհրապ Մնացականեանի:
Իր խօսքում ՀՀ ԱԳ նախարարը Ամենայն Հայոց Կաթողիկոսին ներկայացրեց համաժողովի աշխատանքների ընթացքը` անդրադառնալով ՀՀ արտաքին քաղաքականութեան առաջնահերթութիւններին: Պրն. Մնացականեանը մասնաւորապէս նշեց, որ որդեգրուած արտաքին քաղաքականութեան սկզբունքների հիմքում ընկած են ազգային արժէքներն ու արտաքին քաղաքականութեան հիմնարար սկզբունքները: Այս ենթատեքստում նախարարը յատուկ անդրադարձաւ նաեւ Հայոց Եկեղեցու դերին` գոհունակութեամբ ընդգծելով այն սերտ համագործակցութիւնը, որ առկայ է նախարարութեան եւ Մայր Աթոռի, ՀՀ դիւանագիտական ներկայացուցչութիւնների եւ աշխարհասփիւռ եկեղեցական կառոյցների միջեւ:
Այնուհետեւ դիւանագէտներին իր հայրապետական օրհնութիւնն ու պատգամը փոխանցեց Ամենայն Հայոց Կաթողիկոսը:
«Գոհունակութիւն է Հայրապետիս համար, որ հերթական անգամ համախմբուել էք հայրենիքում` քննարկելու մեր երկրի արտաքին քաղաքականութեան հիմնախնդիրները եւ ուղենշելու այն ճանապարհները, որոնք առաւել արդիւնաւորութեամբ պիտի նպաստեն մեր երկրի զօրացմանն ու առաջընթացին:
Մեծ է այն պատասխանատուութիւնը, որ կրում էք ձեր ուսերին: Ձեզ է վստահուած տարբեր երկրներում ու միջազգային հարթակներում մեր երկիրը ներկայացնելու կարեւոր առաքելութիւնը, որն իր արդիւնքներով անմիջականօրէն առնչւում է Հայաստանի վարկի ու հեղինակութեան, մեր հայրենիքի անվտանգութեան, մեր ժողովրդի բարօր ու ապահով կեանքի տեսլականի հետ: Մեծապէս գնահատում ենք մեր երկրին ու ժողովրդին մատուցած ձեր նուիրեալ ծառայութիւնը եւ բերում ձեզ Մեր օրհնութիւնը` մաղթելով ուժ, եռանդ եւ նոր յաջողութիւններ ձեր հայրենանուէր գործունէութեան մէջ:
Խիստ խորհրդանշական ենք համարում անցկացուող համաժողովի շրջանակներում ձեր այցելութիւնը Մայր Աթոռ Սուրբ Էջմիածին՝ աշխարհասփիւռ մեր ժողովրդի հոգեւոր նուիրական կենտրոն: Հայոց Եկեղեցին հոգեւոր իր առաքելութեանը զուգընթաց շատ յաճախ ստանձնել է նաեւ քաղաքական պատասխանատուութիւն մեր ժողովրդի կեանքում: Մեր պատմութեան ընթացքում թէ՜ պետականութեան գոյութեան եւ թէ՜ բացակայութեան պայմաններում Հայ Եկեղեցին ներգրաւուած է եղել հայրենիքի առջեւ ծառացած ինչպէս ներքաղաքական, այնպէս էլ արտաքին քաղաքական հիմնախնդիրների լուծման գործում՝ կոչմանը հաւատարիմ իր հեղինակութիւնն ու կարողութիւնները ծառայեցնելով հայրենիքի եւ ազգի շահերին: Պատմութիւնը առատ է վկայութիւններով, որոնք մեզ են փոխանցում յանուն երկրի ու ժողովրդի ապահովութեան ՝ իրենց անձնուրաց ծառայութիւնը մատուցած նշանաւոր եկեղեցականների անուններ: Մեր եկեղեցու հովանու ներքոյ է կերտուել ու խնամուել ազատագրական պայքարի ոգին, մարմին առել ազգային իղձերի իրականացման տեսիլքները, սերնդէ սերունդ փոխանցուել հայոց անկախ պետականութեան վերակերտման եւ ազատատենչութեան աննկուն կամքը:
Այսօր էլ մեր Եկեղեցին չի կարող անտարբեր եւ անհաղորդ մնալ մեր երկրի ու ժողովրդի առջեւ ծառացած մարտահրաւէրներին, որոնք չափազանց մեծ կարեւորութիւն ու ընդգրկում ունեն եւ պահանջում են առաւել մեծ ուշադրութիւն եւ ուժերի համախմբում», – նշեց Վեհափառ Հայրապետը:
Ամենայն Հայոց Կաթողիկոսն ընդգծեց, որ պետութեան, Եկեղեցու եւ համազգային կառոյցների ներդաշնակ գործակցութիւնը մեծ ներուժ է պարունակում՝ բազմաթիւ խնդիրների ու հիմնահարցերի լուծման, մասնաւորաբար՝ Ղարաբաղեան հիմնախնդրի խաղաղ կարգաւորման եւ Հայոց Ցեղասպանութեան ճանաչման գործընթացներում: Այս առումով Նորին Սրբութիւնը էական համարեց, որ պետութեան առաջնահերթութիւնների եւ արտաքին քաղաքական գերակայութիւնների սահմանումներում նկատի առնուեն համահայկական կառոյցների օրակարգերը, ինչը հնարաւորութիւն կ’ընձեռի ձեւաւորելու նաեւ արտաքին քաղաքական առաջնահերթութիւնների համազգային օրակարգը:
Նորին Սրբութիւնը, անդրադարձ կատարեց համընդհանուր ջանքերի կարօտ մի շարք խնդիրների, որոնց թւում եւ տարբեր երկրներում հայկական ժառանգութեան պահպանմանը: «Կարեւոր խնդիր է նաեւ աշխարհով մէկ սփռուած եկեղեցական եւ ազգային մշակութային ժառանգութեան խնամատարութիւնը: Մենք ուրախ ենք նշելու, որ այս ուղղութեամբ միասնական ջանքերով կատարուել է մեծ աշխատանք, հարկ է, որ այն նախանձախնդրօրէն շարունակենք՝ հետամուտ լինելով մեր ժառանգութեան անխաթար պահպանութեանը: Արտերկրում մեր մշակութային մասունքներն ու սրբավայրերը իւրայատուկ եւ անփոխարինելի այցեքարտերն են մեր ժողովրդի, որոնց պատշաճ ներկայացումը եւ խնամքը նոր գրաւչութիւն եւ առաւել ընդարձակ ճանաչողութիւն կ’ապահովի մեր երկրի համար», – ասաց Ամենայն Հայոց Կաթողիկոսը:
Խօսքի վերջում Վեհափառ Հայրապետը մաղթեց, որ հայրերի հաւատքով զօրացած մեկնեն իրենց ծառայութեան վայրերը՝ առաւել խանդավառութեամբ ու արդիւնաւորութեամբ իրագործելու իրենց առաքելութիւնը ի նպաստ մեր ժողովրդի եւ մեր երկրի բարօրութեան ու առաջընթացի:
Հանդիպման աւարտին Վեհափառ Հայրապետը պատասխանեց ներկաների հարցերին, քննարկուեցին նաեւ Եկեղեցու եւ Արտաքին գործերի նախարարութեան եւ, ի մասնաւորի, օտարերկրեայ պետութիւններում ՀՀ դիւանագիտական ներկայացուցչութիւնների միջեւ առկայ գործակցութեան զարգացման հեռանկարները:
