Շաբաթ, 08. 02. 2025

spot_img

Ծննդեան 150-ամեակ. ՅՈՎՀԱՆՆԷՍ ԹՈՒՄԱՆԵԱՆԻ ՀԱՄԱՇԽԱՐՀԱՅԻՆ ՄԵԾՈՒԹԻՒՆԸ

ՀԵՆՐԻԿ ԱՆԱՍԵԱՆ

  ՆՈՐ ՕՐ, ԼՈՍ ԱՆՃԵԼԸՍ.- Այս օրերին հայ աշխարհում (նկատի ունեմ թէ՛ Մայր Հայրենիքը եւ թէ՛ աշխարհածաւալ սփիւռքը) աւելի կամ պակաս ճոխութեամբ նշւում է Ամենայն Հայոց Բանաս­տեղծ Յովհաննէս Թումանեանի ծննդեան 150-ամեակը: Հիմնականում  դրանք իրա­կա­նացւում են միութիւնների կամ կազմակերպութիւնների շրջանա­կում: Իրականում, գէթ մեր համայնքի համար անհրաժեշտ էր համաժողո­վրդական, համազգային տօնի վերածել Յովհաննէս Թումանեանի յոբելեանը: Ցնծութիւն, հրավառութիւն տեղի պիտի ունե­նար Լոս Անճելըսի ողջ տարածքին, չէ՞ որ ասում ենք ԱՆԵՆԱՅՆ ՀԱՅՈՑ ԲԱՆԱՍ­ՏԵՂԾ, որի գործերի առջեւ խոնարհուել են մեծն Չարենցը, Շիրազն ու Պարոյր Սեւակը:

   Իրապէս, հաւաքական ուժերով կարելի էր չէ՞ «աշխարհ զարմացնող» միջոցառում կազմակերպել մեծն Լոս Անճելըսի խոշոր սրահներից որեւէ մէկում: Մի կողմ թողնենք մշակութային միութիւն­ների եւ դրանց յարակից կազմակերպու­թիւն­ների միջեւ փո­խա­դարձ համագործակ­ցու­թեան անբաւարար լինելու փաստը, հապա ո՞ւր էր ՀԲԸ Միութիւնը, որի սրբազան պարտքը պիտի լինէր իր ձեռքը վերցնել հանճարեղ գրողի մեծութեանն արժանի գրական-երաժշտական մի փառահեղ միջո­ցառում կազմակեր­պե­լը: Առանձինն, որոշ միութիւններ ինչ որ ձեւով նշեցին Թումանեանի յոբելեանը, բայց դրանք, խորքի մէջ, զուտ խորհրդանշական բնոյթ կրեցին:

   Մեր օրերում, երբ միջոցներն ու հնարաւորութիւնները քիչ թէ շատ բաւարար են, դրանցով իսկ` երբեք պէտք է թոյլ չտալ, որ խամրի Թումանեանի աչք կուրացնող մեծութիւնը: Իսկ այն լուսատու պահելու համար անհրաժեշտ է օգտուել ամէն մի` նոյնիսկ աննշան թուացող հնարաւորութիւնից` կրկին ու կրկին, ի ցոյց ամէնքի, բացա­յայտելու Թումանեանի հանճարն ու մեծութիւնը:

   Ժամանակին, խորհրդային կարգերի ժամանակ, Հայաստանի պատկան մարմինները, գրողները, գրականագէտներն ու թարգմանիչները մեծ ջանքեր են թափել Թումանեանի հանճարը օտարներին հասու դարձնելու համար: Գրեթէ հարիւր տարի ռուս ժողովուրդն ու մտաւորականութիւնը շատ քիչ գաղափար ունէին հայ ժողովրդի, նրա դարաւոր մշակոյթի, գրականութեան մասին: Աւելին. իմացողներն էլ անթաքոյց արգահատանքով էին արտայայտւում հայութեան մասին, նոյնիսկ այնպիսի նշանաւոր գրողներ, ինչպիսին էին Պուշկինն ու Չեխովը:

   Այսպէս. Պուշկինը իր «Գոլուբ» բանաստեղծութեան մէջ ասում է. «Դու` ստրուկ,

Դու` երկչոտ, դու` ՀԱՅ…»: Բանաստեղծից ետ չի մնում գրող-թատերագիր Չեխովը, որն իր «Երկու գեղեցկուհիներ» գրուածքում հերոսին որակաւորում է «Արմեաշ­կա» վիրաւորական, արհամարհական բառով: Տեղին է յիշել, որ նոյն որակումին է արժանացել նաեւ Վահան Տերեանը, որին, հիւանդ վիճակում, իբր գործուղման նպատակով, Ստալինի հրա­մանով, ձմրան սառնամանիքին ուղարկում են Օրենբուրգ` ուր թոքատապից մա­հա­նում է մեր հանճարեղ քնարերգուն եւ յեղափոխականը:

   Թումանեանն առաջինն էր, որ ընդվզեց այդ չարդարացուած որակումների դէմ: Նրա` Թիֆլիսի բնակարանում, որ եղել է գրողների, մտաւորականների հաւաքոյթների եւ խնճոյքների վայր, մշտապէս հնչում էր յաւերժ սեղանապետ Թումանեանի հուժկու եւ պարտաւորեցնող ձայնը հայ գրականութեան մասին, իսկ Վերնատանը թէժ վէճեր էին ծաւալւում օտար բանաստեղծների եւ հայ գրողների միջեւ:

   Ինչպէս Վարդգէս Ահարոնեանն է գրում (Աւետիս Ահարոնեանի որդին) իր` Յով. Թումանեանին նուիրուած «Մարդը եւ բանաստեղծը» մենագրութեան մէջ, համոզիչ մեկնաբանութիւններով գալիս է այն համոզման, որ հայ գեղջուկն էր Թումանեանի գործերի հիմքը, իսկ հայի հաւաքական, ազգային նկարագիրը ամրագրուած է «Սասունցի Դաւիթ» դիւցազներգութեան մէջ:

   Ոչ մի գրագէտ մարդու համար գաղտնիք չէ, որ Յով. Թումանեանը իր կարճատեւ կեանքի ընթացքում կարող էր շատ աւելին տալ հայ գրականութեանը, եթէ նրան չխանգարէր հասարակական լայն գործունէութիւնը, մանաւանդ, փոքրիշատէ փխ­րուն առողջութիւնը.

Կեանքս արի հրապարակ, ոտքի կոխան ամէնքի,

Խափան, խոպան ու անպտուղ անցայ առանց արդիւնքի:

Ինչքա՜ն ծաղիկ պիտի բուսնէր, որ չբուսաւ էս հողին…

Ի՜նչ պատասխան պիտի ես տամ հող ու ծաղիկ տըւողին…

Դէ, արի՛ ու հաւատա՛, որ նման տողեր գրողը թերի միջնակարգ կրթութիւն ստացած մէկն է, որը յետագայում դառնալու է Ամենայն Հայոց Բանաստեղծ:

ԲԱՐԲԱՌ ԵՒ ԵՐԱԺՇՏԱԿԱՆՈՒԹԻՒՆ

   Հետաքրքիրն այն է, որ Թումանեանը զգում էր, որ իր բանաստեղծութիւնները հետագայում վեր էին ածուելու երգերի, եւ հենց դրանք երգային դարձնելու միտումով էլ մի շարք ցուցական դերանուններ վերափոխում էր Լոռու բարբառով` արժանանալով իր ժամանակի մի շարք բանաստեղծների արհամարհանքին:

   Լոռեցու բարբառը միս ու արիւն էր նրա համար: Այժմ տեսէք թէ որքան երաժշտական է դարձել «Անուշ» պոէմի այս հատուածը` ցուցական երկու դերանուններից մէկական տառ հանելուց յետոյ:

   «Այս» եւ «այն» դերանունների փոխարէն, Թումանեանը օգտագործել է «էս» ու «էն»-ը, որի շնորհիւ էլ Արմէն Տիգրանեանի համար, վստահ եմ, աւելի դիւրին է եղել ԷՍ ու ԷՆ-ը, քան թէ ԱՅՍ ու ԱՅՆ-ը: Հէնց թէկուզ այս մէկ օրինակը բաւարար է մեր ասածի հաստատման համար: Ներքոյ բերուող օրինակը Սարոյի արիան է «Անոյշ» օպերայից.                                      

Ա՜խ, Անո՜յշ, Անո՜յշ, ԷԴ ինչ ես ասում, բա դու չե՞ս լսում.

ԷՆ, որ լանջերին խաղեր եմ ասում` ո՞ւմ հետ եմ խօսում:

ԷՆ, որ հառաչում ու ա՜խ եմ քաշում, ԷՆ ո՞ւմ եմ յիշում…

 

Դէ եկէք, ու այսօր Սարօ-երգչին ասէք, որ երգի հետեւեալ բառերով. «Ա՜խ, Անո՜յշ, Անո՜յշ, ԱՅԴ ի՞նչ ես ասում», կամ էլ`«ԱՅՆ, որ լանջերին խաղեր եմ ասում, ԱՅՆ որ հառաչում, ԱՅՆ ո՞ւմ եմ յիշում»:

   Բաւականին ծիծաղելի կը թուայ չէ՞. գեղջուկ հովիւը գրական հայերէնով է իր սրտի խռովքը յայտնում սիրած աղջկան` Անոյշին:

   Եւ, հետաքրքիրն այն է, որ 1905-06 թ.թ. տարբեր ժողովածուներում տպագրուած այդ ցուցական դերանունները Թումանեանը գրել է գրական հայերէնով, այսինքն`«այդ» եւ «այն»: Այդ յետոյ, տարիներ անց, ինքն է փոխել դրանք` էլ աւելի յարմարեցնելով միջավայրին, բնութեանն ու տեղանքին:  

   Յովհ. Թումանեանի ողջ գրական ժառանգութիւնը շնչում է չքնաղ երաժշտականութեամբ: Պատահական չէ, որ նրա գրական հայերէնով գրուած բանաստեղծութիւնների եւ պոէմների մեծաթիւ գործեր երաժշտականացուել են առնուազն երկտասնեակ եր­գա­հան-կոմպոզիտորների կողմից:

   Հէնց միայն յիշելու համար թուենք լայն տարածում գտած, Թումանեանի բառերով յօրինուած երգերից մի քանիսը. Սպենդիարեանի նշանաւոր «Վարդը» ռոմանսը, Ռ. Մելիքեանի «Սեւ կաքաւիկ» երգը, «Աշնան երգ»ը, Կոմիտասի «Կաքաւի երգ»ը, Անտոն Մայիլեանի «Ինձ մի խնդրիր» ռոմանսը: Յովհ. Թումանեանի բառերով եր­գեր են գրել կոմպոզիտորներ Մարտին Մազմանեանը, Անուշաւան Տէր-Ղեւոնդեանը, Էդգար Յովհաննիսեանը, սփիւռքահայ կոմպոզիտորներ`Բարսեղ Կանաչեանը, Գուր­գէն Ալեմշահը, Նիկոլ Գալանտէրեանը եւ ուրիշներ: Թումանեանի բանաստեղծութիւնների հիման վրայ, Ձեր խոնարհ ծառան` Հենրիկ Անասեանը գրել է չորս խմբերգ եւ վեց մեներգ, որոնք բազմիցս կատարուել են թէ՛ Հայաստանում եւ թէ՛ արտերկրում:

   Թումանեանի խօսքերով յայտնի են մանկական երկու օպերաներ` Ազատ Մանուկեանի «Չարի վերջը» եւ Անտոն Մայիլեանի «Չարաճճի Միկիչը»: Թումանեանի պո­էմների հիման վրայ բալէտ է գրել Գրիգոր Հախինեանը: Անմահութեան ճամբով ընթացող սիրտ մաշող «Գիքոր» պատմուածքն է օպերայի վերածել կոմպոզիտոր Ստեփան Ջրբա­շեանը: Յովհ. Թումանեանի գործերի հիման վրայ ստեղծուել են շարժապատկերներ:

«ԱՆՈՅՇ»Ը

   Այս ամէնի մէջ, անշուշտ, ամենաժողովրդականն ու ամենասիրուածը Թումանեանի «Անոյշ» պոէմն է, որը Արմէն Տիգրանեանի հանճարեղ երեւակայութեամբ վեր է ածուել օպերայի:

   Յայտնի է, որ Թումանեանի «Անոյշ» պոէմին դիմել են շատերը, բայց այն օպերայի վերածելու անմիջական քայլերը պատկանում են Կոմիտասին եւ ռուսահայ կոմպոզիտոր Եղիշէ Բաղդասարեանին, մասամբ նաեւ Կարա Մուրզային: Իր գործունէութեան ոչ շատ երկար տարիների ընթացքում Կոմիտասը մեծ ջանք է թափել «Անուշ» պոէ­մը օպերայի վերածելու համար: Այսօր էլ յայտնի են Կոմիտասի «Անուշ» անաւարտ օպերայի մի քանի հատուածներ: Թումանեանի պոէմը, ըստ Կոմիտասի գրառում­ների, ամբողջութեամբ պիտի պահպանուէր իր բոլոր գործող անձերով եւ բովանդակութեան զարգացման նոյն յաջորդականութեամբ: Սակայն, դժբախտաբար Կոմիտասը չկարո­ղացաւ աւարտին հասցնել օպերան:

   Այս ամէնով հանդերձ, միայն Արմէն Տիգրանեանին էր վիճակուած իրականացնել «Անոյշ» օպերայի ստեղծումը, օպերա, որը ըստ մեզ` երգ-օպերա է ոչ միայն ժողովրդի մէջ տարածուած երգերով ու խմբերգերով, այլեւ բուն ժողովրդական երաժշտութիւնից վերցուած սքանչելի մեղեդիներով  եւ պարեղանակներով:

    Յովհ. Թումանեանի պոէմն ընթերցելուց յետոյ Արմէն Տիգրանեանը գրում է. «Առաջին վայրկեանից ինձ համար պարզ դարձաւ, որ «Անոյշ» պոէմը հիանալի նիւթ է օպերայի համար, մի գործ, որի մէջ ցայտուն գծերով, գունագեղ նկարագրումով պատկերուած է անցեալի կեանքն ու կենցաղը հայկական գիւղում: «Անոյշ»-ի թե­ման ամբողջովին կլանեց ինձ: Չխօսելով պոէմի գեղարուեստական բարձր արժէքի մասին, նրա կառուցուածքը, կերպարաւորման հիանալի հիւսուածքը, նախաբանը, փէրիների ողբն ու Սարոյի սերենադը, եւ այլ հիանալի պատկերներ` այս ամէնը դրդեցին ինձ երաժշտական որոշակի ձեւով ներկայացնել, որը եւ եղաւ համանուն օպերան»:

   «Անոյշ» օպերայի գրական տեքստը ստեղծեց ինքը` կոմպոզիտորը` խնամքով պահպանելով Թումանեանի պոէմի կառուցուածքը, դէպքերի յաջորդականութիւնը, գրական ոճն ու, մանաւանդ` լեզուն, գրական-բարբառային այն հիւսուածքը, որ բնորոշ էր Հայաստանի Լոռու շրջանին:

   «Անոյշ»ը Թումանեանի բանաստեղծական ստեղծագործութեան գագաթներից է, որն այսօր շարունակում է իր յաղթական երթը երաժշտութեան ճանապարհով: Արմէն Տիգրանեանի «Անոյշ» օպերան իրաւամբ դարձաւ Թումանեանի գրական երազան­քի  ամենաճշմարիտ եւ արժանի մարմնաւորումը երաժշտութեան միջոցով:

  «Անոյշ»ը մեր ազգային հպարտանքն է, մեր օպերային արուեստի մարգարիտը: «Անուշ»ը հայ ժողովրդի երեւակայութեան մէջ իրար է միացրել Յովհաննէս Թումանեանի եւ Արմէն Տիգրանեանի անուններն ու հանճարը:

   Մեզ մնում է միայն բոլոր հնարաւոր միջոցներով գալիք սերունդներին փոխանցել Մեծ լոռեցու հմայիչ ու գերող գրականութեան բոյրը:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Ara D. Kassabian CPA, based in Glendale, California, provides a full range of tax preparation, accounting and bookkeeping services, either in your facility or at our location. Making it quick and easy to file your taxes.

spot_img

Զօրակցիր Զարթօնք Օրաթերթին