Երկուշաբթի, 22. 07. 2024

spot_img

ԹՄՄ Լիբանանի Տեղական Վարչութեան Կազմակերպած Գրական Երեկոն

ՎԻԳԷՆ Կ. ԹՈՍՈՒՆԵԱՆ

«Զարթօնք»ի աշխատակից 

Հոկտեմբեր 17ի երեկոյեան ժամը 8ին, Պէյրութի Թէքէեան Կեդրոնին մէջ տեղի ունեցաւ գրական երեկոյ կազմակերպութեամբ Թէքէեան Մշակութային Միութեան Տեղական Վարչութեան:  Երեկոյին ներկայ էր գրասէր բազմութիւն մը: Ներկայ էր Թէքէեան Մշակութային Միութեան Հիմնադիրներու Մարմնի ատենապետ, նախկին պետական երեսփոխան Ընկ. Յակոբ Գասարճեան, Արեւմտեան Հայաստանի Ազգային Խորհուրդի վարչապետ Գառնիկ Սարգիսեան եւ ՌԱԿ Շրջանային վարչութեան ու Թէքէեան Մշակութային Միութեան անդամներ: Երեկոյի ընթացքին գրական շրջանակին ներկայացուեցան երիտասարդ տաղանդներ՝ Օրիորդներ Մանէ Անի Պասմաճեանի եւ Սարին Արապաղեանի բանաստեղծական ստեղծագործութիւնները: Ձեռնարկին գլխաւոր զեկուցաբերն էր Պէյրութի Վահան Թէքէեան վարժարանի հայագիտական նիւթերու ուսուցիչ, բանասէր Տիար Աւետիս Տիպան:

Ձեռնարկին բացման խօսքը կատարեց Թէքէեան Մշակութային Միութեան Լիբանանի Տեղական վարչութենէն Տիկին Լենա Պալըքճեանը, որ յայտնեց այս ձեռնարկին նպատակը՝ ներկայացնել նոր սերունդի գրական տաղանդներ: Երիտասարդներ, որոնք իրենց տաղանդով պիտի շարունակեն վառ պահել հայ գրականութեան ջահը: Ապա ան յաջորդաբար սկսաւ հակիրճ ձեւով ներկայացնել իւրաքանչիւրը:

Օրդ. Մանէ Անի Պասմաճեան յաճախած է Մելանքթոն եւ Հայկ Արսլանեան ճեմարան ու ներկայիս կը հետեւի մարդաբանութեան եւ հանրային վարչարարութեան ճիւղին Պէյրութի Ամերիկեան Համալսարանին մէջ: Ան արդէն «Պահուըտած Ժպիտ» հատորին հեղինակն է: Ան մրցանակակիր է հայ գիրքի մրցանքին: Մանէ տպաւորիչ առոգանութեամբ ներկայացուց «Մանկութիւն», «Պարոյր Սեւակ», «Հայոց Բանակին», «Մարդկային Արժէքներ» եւ Շուպըրթի երաժշտութեան ընկերակցութեամբ սիրային բանաստեղծութիւն մը: Մանէի բանաստեղծութիւնը կը յատկանշուի խորունկ վերլուծումով եւ գեղեցիկ պատկերներով: Ան խոկումի եւ խորքի բանաստեղծուհին է: Օրդ. Պասմաճեան ապագային կը խոստանայ դառնալ պայծառ անուն մը մեր գրականութեան անդաստանին մէջ:

Ապա Վահան Սաղտըճեան դաշնամուրի վրայ գեղեցկօրէն ներկայացուց «Երազ Իմ Երկիր» երաժշտական կտորը:

Օրդ. Սարին Արապաղեան աւարտած է Դարուհի Յովակիմեան վարժարանը: Ապա հետեւած է տեղեկատուական արհեստագիտութեան ճիւղին Միտըլ Իսթ համալսարանին մէջ: Ներկայիս «Զարթօնք» օրաթերթի քարտուղարուհին է:  Սարին մեծ յուզումով ներկայացուց իր բանաստեղծութիւնները՝ «Կարօտ», որու նիւթն է իր կարօտը հայրենի հողին եւ հայերէն լեզուին հանդէպ, «Ֆետայիի Յիշատակին» եւ «Քաջարի Որդիս», որու նիւթն է բանակ ծառայութեան մեկնող տղու մը մօր յուզումը եւ քաջարի տղուն խոստումը վերադառնալու:

Օրդ. Վարդի Սալխանեան աւարտած է Վահան Թէքէեան Միջնակարգ վարժարանը եւ ներկայիս կը յաճախէ Սահակեան Լ. Մկրտիչեան Գոլէճ: Կը սիրէ եկեղեցին ու կը ծառայէ անոր որպէս դպրուհի եւ Կիրակնօրեայ վարժարանի օգնական: Վարդի ներկայացուց ասմունք՝ Վահան Թէքէեանի բանաստեղծութիւններու «Ծաղկաքաղ», ապա Լեւոն Մինասեանի «Տլէ Եաման» տուտուկի երաժշտութեան ընկերակցութեամբ Վահէ Օշականի «Տարեդարձ»ը, որուն նիւթն է տարագիր հայ անհատին պայքարը իր ոգիի փնտռտուքին մէջ: Վարդի տաղանդաւոր ասմունքող է եւ ապագային գեղեցիկ անակնկալներ կը պահէ հայ ասմունքի համակիրներուն:   

Տիար Աւետիս Տիպան գեղեցիկ ոճով ներկայացուց հայ գրականութեան հինգ ժամանակաշրջանները: Անոնք են՝

Հնագոյն շրջան – անյիշելի ժամանակներէն մինչեւ Վանի թագաւորութեան անկումը:

Հին շրջան – Երուանդունիներու թագաւորութեան կազմաւորումէն մինչեւ քրիստոնէութեան հռչակումը որպէս պետական կրօն:

Միջնադար – Քրիստոնէութիւնը պետական կրօն հռչակուելէն մինչեւ հայ ազգային-ազատագրական շարժման վերելքը:

Նոր շրջան – կը սկսի  հայ ազատագրական շարժումներով եւ կը հասնի մինչեւ Հայաստանի առաջին Հանրապետութեան հռչակումը։

Նորագոյն շրջան – կ’ընդգրկէ Հայաստանի առաջին, երկրորդ (Խորհրդային) եւ երրորդ հանրապետութիւնները՝ ներառնելով Արցախը:

Ան յիշեց իւրաքանչիւր շրջանի գրողներու անուններ եւ ընթերցեց նմոյշներ անոնց գործերէն: Իսկական պտոյտ մըն էր հայ գրականութեան անդաստանին մէջ եւ առիթ մըն էր յիշելու մեր մեծերը: (Խօսքը պիտի տանք առանձին):

Փակման խօսքով հանդէս եկաւ Տիար Վիգէն Թոսունեան, որ շեշտեց մեր մշակոյթը փոխանցելու կարեւորութիւնը եւ յայտնեց իր անսահման ուրախութիւնը, որ կան երիտասարդներ պատրաստ վերցնելու գրականութեան ջահը: Ան, իր խօսքը ուղղելով երիտասարդներուն, ըսաւ հետեւեալը. «Այսօր անսահման է մեր ուրախութիւնը տեսնելով նոր սերունդի ներկայացուցիչներ, որոնք մեզի ներկայացուցին բանաստեղծութիւն եւ ասմունք: Այո, հաւատացէք նոր սերունդին: Ձեր ձեռքը դրէք անոնց ձեռքին մէջ եւ պիտի տեսնէք որ անոնք պիտի պահեն իրենց հասած ջահը ու զայն փոխանցեն իրենց յաջորդներուն: Մեր ժողովուրդը հպարտ է, որ ունի ձեզի նման երիտասարդ ուժեր: Երիտասարդներ, որոնք գիտեն պահել մեր մշակութային աւանդը: Ապրիք աղջիկներ, մեզի ուրախութիւն պարգեւեցիք: Ձեր գրիչը եւ խօսքը միշտ դալար մնան»:

Ան յատկապէս շնորհակալութիւն յայտնեց Թէքէեան Մշակութային Միութեան Լիբանանի Տեղական Վարչութեան, Միութեան Հիմնադիրներու Մարմինին եւ անհատ բարերարներու, որոնք իրենց նիւթաբարոյական օժանդակութիւնը միշտ կը բերեն այս սրբազան գործին յաջողութեան համար: Ան յատկապէս յիշեց Միութեան «Երուանդ Օտեան» թատերախումբը, «Եութ Պէնտ» երիտասարդական նուագախումբը, գեղարուեստական ցուցահանդէսները եւ գրական երեկոները, որոնք կը վայելեն Միութեան նեցուկը: 

Աւարտին, ներկաներ շնորհաւորեցին տաղանդները եւ գոհ սրտով հեռացան:]       

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին