«ԶԱՐԹՕՆՔ», ՊԷՅՐՈՒԹ – ՀՀ կառավարութիւնը Օգոստոս 30-ին գումարած է հերթական նիստը, որ վարած է ՀՀ վարչապետ Նիկոլ Փաշինեան:
Ինչպէս կը փոխանցէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ նախքան օրակարգային հարցերու քննարկումը, վարչապետը հանդէս եկած է յայտարարութեամբ. «Կառավարութեան, այսպէս ասած, ադապտացիոն շրջանը համարում եմ աւարտուած, եւ առաջիկայում մենք շատ լրջօրէն պէտք է զբաղուենք բարեփոխումների լայնածաւալ գործողութիւններով, որոնք, իրենց հերթին, տնտեսական եւ քաղաքական զարգացման նոր շունչ, նոր լիցք եւ ալիք կը բերեն Հայաստան: Ես կարծում եմ, որ մենք պէտք է արձանագրենք բարեփոխումների մեր մեթոտաբանութիւնը՝ հաշուի առնելով Հայաստանում առկայ քաղաքական իրողութիւնները:
Ընդհանրապէս, ընդունուած է ասել, որ բարեփոխումները, այսպէս ասած, ցաւոտ գործընթաց են: Ես կարծում եմ, որ մենք պէտք է այս տրամաբանութիւնից հրաժարուենք, որովհետեւ բարեփոխումների մեր ալգորիթմը պէտք է լինի ընդարձակ երկխօսութիւնը հանրութեան հետ, եւ հանրութեան շրջանում համաձայնութեան հաստատումն այս կամ այն բարեփոխման վերաբերեալ, այս կամ այն բարեփոխման ուղղութեամբ, որովհետեւ կարծում եմ, որ եթէ մենք որեւէ բարեփոխում իրականացնելու համար ունենք բաւարար փաստարկներ, որով համոզել ենք ինքներս մեզ, ուրեմն, այդ նոյն փաստարկներով պէտք է ներկայանանք նաեւ հանրութեանը, ամենայն մանրամասնութեամբ նրան ներկայացնենք մեր մոտիվացիաները, պատճառահետեւանքային կապերը: Ես համոզուած եմ, որ այս ճանապարհով մեր գործողութիւնները եւ բարեփոխումները կը լինեն առաւել արդիւնաւէտ: Ի վերջոյ, չմոռանանք, որ այսօր Հայաստանի Հանրապետութիւնում ունենք կառավարման բոլորովին նոր համակարգ, որը մենք պայմանականօրէն կոչում ենք ուղիղ ժողովրդաիշխանութիւն, եւ դա այդպէս կոչուում է պատմականօրէն: Մենք պէտք է կառավարման այս համակարգի տրամաբանութիւնից բխող գործողութիւններ անենք:
Կարծում եմ՝ միւս շաբաթուանից արդէն կարող ենք սկսել հանրութեան հետ երկխօսութիւնը Հարկային օրէնսգրքի փոփոխութիւնների վերաբերեալ: Այդ երկխօսութիւնը կ«իրականացնենք տարբեր ծաւալներով, տարբեր ֆորմատներով, եւ մեր խնդիրը կը լինի առաջարկուող մոտելների վերաբերեալ հանրային աջակցութիւն, հանրային ըմբռնում եւ հանրային ընկալում ձեւաւորելը: Խօսքը վերաբերում է ոչ միայն հարկային ոլորտի բարեփոխումներին: Մենք ընդարձակ բարեփոխումներ պէտք է իրականացնենք, այդ բարեփոխումները չպէտք է լինեն հապշտապ, ափալ–թափալ, չմտածուած, թելադրուած: Դրանք պէտք է ուղիղ եւ օրկանական կապ ունենան մեր ազգային շահերի, մեր առաջադրած խնդիրների եւ Հայաստանում տեղի ունեցած ոչ բռնի, թաւշեայ ժողովրդական յեղափոխութեան առաջադրած խնդիրների հետ: Այնպէս որ, կարծում եմ, որ բոլորս պէտք է այս առումով ազդարարենք մեր աշխատանքի նոր փուլի մեկնարկը, եւ բոլորիս այս աշխատանքն իրականացնելիս մաղթում եմ պրոֆեսիոնալիզմ, իմաստութիւն, խելամտութիւն, եւ, իհարկէ, յաջողութիւն»:
