Ուրբաթ, 19. 07. 2024

spot_img

Մայր Աթոռում Տեղի Ունեցաւ Քահանայից Ժողով

Մայիսի 24-ին Մայիսեան հերոսամարտերի եւ Հայաստանի առաջին Հանրապետութեան 100-ամեակի տօնակատարութիւնների սեմին, Մայր Աթոռ Սուրբ Էջմիածնում, բարձր նախագահութեամբ Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսի, տեղի ունեցաւ քահանայից հերթական հաւաքը:

Ժողովին ներկայ էին թեմակալ առաջնորդներ, Մայր Աթոռում պաշտօնավարող եպիսկոպոսներ, Մայր Աթոռի 36 միաբաններ եւ 182 քահանաներ:

Ամենայն Հայոց Կաթողիկոսի գլխաւորութեամբ եկեղեցականաց դասը նախ Մայր Տաճարում մասնակցեց ժամերգութեանը, ապա Մայր Տաճարի շրջափակում Երանաշնորհ Գէորգ Է. Սուրէնեանց Կաթողիկոսի շիրիմի առջեւ կատարուեց հոգեհանգստեան կարգ:

Արարողութեան աւարտին Գարեգին Բ. Վեհափառ Հայրապետը, աղօթք վերառաքելով առ Բարին Աստուած, մաղթեց, որ Մայիսեան հերոսամարտերի 100-ամեայ յոբելեանին ընդառաջ` նուիրական այս օրերին, հոգեւորականաց դասը ոգեշնչուի լուսաւոր Հայրապետի, նորօրեայ Աւարայրի Ղեւոնդ Երէցի պայծառ կերպարով` իր հոգեւոր առաքելութեան ընթացքում արձանագրելով նորանոր յաղթական իրագործումներ:

Այնուհետեւ Էջմիածնի «Հրաչ եւ Սիւզան Թուֆայեան» Հայորդեաց տանը ժողովն սկսեց իր աշխատանքը: Միասնական Տէրունական աղօթքից յետոյ բացման խօսք ասաց քահանայից հաւաքի կազմակերպիչ յանձնախմբի նախագահ Գերաշնորհ Տ. Միքայէլ եպիսկոպոս Աջապահեանը:

Ժողովի ընթացքում քննարկման նիւթ դարձան ներքաղաքական կեանքում տեղ գտած վերջին շրջանի իրադարձութիւնները: Այս առիթով զեկոյց ներկայացրեց Մայր Աթոռի Տեղեկատուական համակարգի տնօրէն Արժանապատիւ Տ. Վահրամ քահանայ Մելիքեանը` անդրադառնալով երկրում տեղ գտած քաղաքական զարգացումների ընթացքում համերաշխութեան ու խաղաղութեան մթնոլորտի ձեւաւորմանը, երկխօսութեան միջոցով խնդիրների հանգուցալուծմանն ուղղուած Մայր Աթոռ Սուրբ Էջմիածնի քայլերին:

Այնուհետեւ «Ընտանեկան բռնութեան կանխարգելման եւ ընտանեկան բռնութեան ենթարկուած անձանց պաշտպանութեան մասին» ՀՀ օրէնքի վերաբերեալ զեկոյցով հանդէս եկաւ Տաւուշի թեմի առաջնորդ Գերաշնորհ Տ. Բագրատ եպիսկոպոս Գալստանեանը` տեղեկութիւններ փոխանցելով օրէնքի առնչութեամբ Մայր Աթոռի կողմից ներկայացուած դիտարկումների եւ առաջարկների մասին: Մասնաւորապէս խօսուեց հովուական ծառայութեան մէջ ընտանիքների հետ տարուող աշխատանքների կարեւորութեան վերաբերեալ: 

 Երրորդ զեկոյցը, որ ներկայացրեց Մայր Աթոռի դիւանապետ Գերաշնորհ Տ. Արշակ եպիսկոպոս Խաչատրեանը, վերաբերում էր «Մտքի, խղճի, կրօնի ազատութեան եւ կրօնական կազմակերպութիւնների մասին» ՀՀ օրէնքի նախագծին:

Զեկոյցների շուրջ քննարկումներ ծաւալուեցին, եկեղեցականները ներկայացրեցին իրենց դիտարկումներն ու առաջարկները:

 Այնուհետեւ ժողովականներին իր հայրական օրհնութիւնը փոխանցեց Նորին Սրբութիւն Գարեգին Բ. Ամենայն Հայոց Կաթողիկոսը: Վեհափառ Հայրապետն իր գնահատանքը յայտնեց ժողովի կազմակերպիչ յանձնախմբին եւ թեմակալ առաջնորդներին` գոհունակութիւն արտայայտելով անկաշկանդ, անկեղծ ու շահեկան քննարկումների համար:

Նորին Սրբութիւնը նախախնամական նկատեց, որ ժողովը տեղի է ունենում Մայիսեան հերոսամարտերի, Հայաստանի առաջին Հանրապետութեան հաստատման 100-ամեակի տօնախմբութիւնների նախօրէին: Հայոց Հովուապետն անդրադարձ կատարեց հերոսամարտերում եկեղեցականաց բերած վիթխարի աւանդին եւ վճռորոշ դերակատարութեանը, երբ հայրենիքի պաշտպանութեան սրբազան մարտում Հայոց Եկեղեցին առաջնորդեց ժողովրդին, գտնուեց առաջնագծում:

Նորին Սրբութիւնն ընդգծեց, որ այս բարձր գիտակցութեամբ եկեղեցականները պիտի շարունակեն իրենց առաքելութիւնը ժողովրդի կեանքում` իրենց հոգում ունենալով սէրը մեր ժողովրդի նկատմամբ:

Ամենայն Հայոց Կաթողիկոսն անդրադարձ կատարեց նաեւ հայրենիքում տեղ գտած վերջին իրադարձութիւններին:

«…Մենք պէտք է յստակ բանաձեւենք, որ մեր երկրի պաշտպանութեան, մեր ժողովրդի կեանքի անվտանգութեան պարագաներին Եկեղեցին գտնուում է առաջնագծում:

Երբ իրադարձութիւններն ընթանում էին ներազգային կեանքում, որտեղ մեր ժողովրդի զաւակներն էին հակադրութեան մէջ, այդ իրավիճակում մենք մի առաքելութիւն ունէինք, որը եւ փորձեցինք իրականացնել՝ հանդարտութեան կոչ ուղղել, համերաշխութեան ոգին զօրացնել, թշնամանքն ու ատելութիւնը բացառել մեր ժողովրդի կեանքից եւ թոյլ չտալ, որ մեր զաւակների միջեւ բախում լինի, որ հայորդու արիւն թափուի, եւ խնդիրներն իրենց հանգուցալուծումը գտնեն իրաւական դաշտում:

…Այսօր յուզումները տակաւին առկայ են մեր կեանքում եւ մեր առաքելութիւնը պիտի լինի այն, որ շարունակենք մեր աշխատանքը նոյն ոգով ու նոյն նախանձախնդրութեամբ, որպէսզի տեղ չգտնեն մեր ժողովրդի կեանքում ատելութիւն եւ անհանդուրժողութիւն, բախումներ, հակառակութիւններ, իսկ մեր առաքելութեան մասին ընդհանրապէս նշենք, որ մենք պարտաւոր ենք մեր ժողովրդի կեանքը խարսխել քրիստոնէական բարոյական արժէքների վրայ: Միայն այդպէս կարող ենք ազատել մեր կեանքը արատաւոր երեւոյթներից, սխալներից, սայթաքումներից, անարդարութիւններից եւ բոլոր այն դրսեւորումներից, որոնք որ ընդվզումի եւ դժգոհութեան պատճառ են դառնում ժողովրդի կեանքում», – նշեց Վեհափառ Հայրապետը:

Նորին Սրբութիւնը եկեղեցականներին մաղթեց, որ նուիրումով շարունակեն կատարել իրենց ծառայութիւնը՝ լցուած անվերապահ եւ անպայմանաւոր սիրով հանդէպ ժողովուրդը եւ հայրենի երկիրը, եւ ընդգծեց, թէ այն սէրը, որ իւրաքանչիւր զաւակ փոխադարձաբար տածում է Ս. Եկեղեցու հանդէպ, նաեւ կը շարունակի լինել ու մնալ զօրացնող ուժը Հայոց Եկեղեցու:

Վերջում քահանայից հաւաքի մասնակիցները հանդէս եկան յայտարարութեամբ, որում ասուած է.

«Հայաստանում սպասաւորող եկեղեցականաց մեր ողջ դասով համախմբուած Մայր Աթոռ Սուրբ Էջմիածնում՝ Ամենայն Հայոց Կաթողիկոս Գարեգին Երկրորդի հովանու ներքոյ աղօթում ենք մեր Հայրենիքի խաղաղութեան ու ապահովութեան, մեր Սուրբ Եկեղեցու պայծառութեան ու մեր ժողովրդի բարօր կեանքի համար:

Անդրադարձ կատարելով վերջին շաբաթների ներհայաստանեան իրադարձութիւններին, գոհութիւն ենք յայտնում Ամենակարող Բարձրեալին, որ մեր ժողովուրդը իրեն յատուկ ողջամտութեամբ կարողացաւ զերծ պահել մեր երկիրը աւելորդ ցնցումներից ու անցանկալի զարգացումներից: Այս օրերին մենք ականատես եղանք մեր ժողովրդի եւ յատկապէս մեր երիտասարդների՝ առ հայրենիքը սիրոյ եւ նախանձախնդրութեան ոգուն, երկրի ապագայի հանդէպ պատասխանատուութեան գիտակցութեանը, ինչը յուսադրող կարեւոր գրաւական է երկրի հետագայ կայուն եւ անշրջելի զարգացման համար:

Վերջին զարգացումների արդիւնքում Հայաստանը թեւակոխել է նոր շրջան՝ մեր ժողովրդի մէջ առաջացնելով դրական փոփոխութիւնների մեծ ակնկալիքներ ու սպասումներ: Մեր երկրի առջեւ ծառացած ներքին եւ արտաքին մարտահրաւէրների մէջ մենք մեծապէս կարեւորում ենք հանրութեան մէջ սիրոյ, գործակցութեան եւ համերաշխութեան ոգու զօրացումը, միմեանց նկատմամբ ատելութեան ու թշնամանքի դրսեւորումների բացառումը, որը նաեւ առաքելութիւնն է մեր Սուրբ Եկեղեցու: Մեր ժողովուրդը մշտապէս հաւատքով, յոյսով ու սիրով է ապրել ու արարել, յաղթահարել իր կեանքի բոլոր դժուարութիւններն ու փորձութիւնները: 

Մենք յորդորում ենք անխախտ ու անսասան պահել մեր համազգային միասնականութիւնը եւ աշխարհասփիւռ մեր ողջ ժողովրդի ուժերի ու հնարաւորութիւնների համախմբմամբ շարունակել անշեղօրէն հետամուտ լինել ազգային իղձերի ու նպատակների իրականացման տեսլականին:

Թող Ամենակարողն Աստուած առատապէս օրհնի եւ Իր Սուրբ Աջով պահապան լինի Հայոց աշխարհին, մեր Սուրբ Եկեղեցուն ու համայն մեր ժողովրդին»:

Ժողովի աւարտին հոգեւորականաց դասը մասնակցեց երեկոյեան ժամերգութեանը:

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին