ՀՀ մշակոյթի նախարարութեան, Երեւանի քաղաքապետարանի աջակցութեամբ եւ Հայաստանի երգահաններու միութեան նախաձեռնութեամբ` Մայիս 10-12 պիտի իրականացուի Էդուարդ Միրզոյեանի անուան պատանի երգահաններու 5-րդ հանրապետական մրցոյթը, որ կը նուիրուի Երեւանի հիմնադրման 2800-ամեակին:
Ըստ ՀՀ մշակոյթի նախարարութեան փոխանցած տեղեկութիւններուն՝ մրցոյթին կրնան մասնակցիլ Հայաստանի Հանրապետութեան, Արցախի Հանրապետութեան եւ Սփիւռքի մինչեւ 18 տարեկան հայ պատանի ստեղծագործողները:
Մրցոյթի աւագ խումբի (14-18 տարեկան) մասնակիցները, բացի գործիքային ստեղծագործութենէ մը, պէտք է ներկայացնեն նաեւ երգ մը, որ նուիրուած պիտի ըլլայ քաղաքամայր Երեւանին: Ի դէպ, լաւագոյն երգը պիտի պարգեւատրուի Երեւանի քաղաքապետի պատուոգիրով:
Կրտսեր խումբին մէջ (մինչեւ 13 տարեկան) նախորդ տարիներու համեմատ կատարուած է փոփոխութիւն․ պատանի երգահանը կրնայ ներկայացնել ցանկացած գործիքի համար գրուած մէկ ստեղծագործութիւն` նախկին պարտադիր պայման դաշնամուրային ստեղծագործութեան փոխարէն:
Երգահանական ստուգատեսի բոլոր մասնակիցները պիտի պարգեւատրուին մասնակցութեան վկայականներով, իսկ մրցանակային տեղեր զբաղեցուցած մասնակիցները` վկայականներով, խրախուսական նուէրներով: Մրցոյթի երկու ենթախումբերու յաղթողները պիտի պարգեւատրուին նաեւ դրամական պարգեւներով: Երկու ենթախումբերու յաղթող մասնակիցներու ուսուցիչները եւս պիտի պարգեւատրուին դրամական պարգեւներով:
Յայտերու ընդունման ժամկէտը Մայիս 5-ն է:
