Թուրքիոյ Քարաման նահանգին մէջ գտնուող Սուրբ Աստուածածին հայկական եկեղեցւոյ առաստաղի որմնանկարները տեղացի եւ օտարերկրացի զբօսաշրջիկներու կողմէ մեծ հետաքրքրութեան կ’արժանանան: Այս մասին կը յայտնէ «Էրմէնիհապեր»-ը՝ վկայակոչելով թրքական «Անատոլու» լրատուական գործակալութիւնը:
Քաղաքի հնագոյն Թափուջաք թաղամասին մէջ գտնուող եկեղեցին կը համարուի բիւզանդական ժամանակաշրջանէն մնացած բազիլիկ եկեղեցւոյ օրինակ:
Ըստ աղբիւրին` թէ ո՛ր թուականին կառուցուած է եկեղեցին, ստոյգ տեղեկութիւն չկայ. ան կը թուագրուի 17-18-րդ դարերուն:
Եկեղեցին 2007 թուականին անցած է Թուրքիոյ Մշակոյթի եւ զբօսաշրջութեան նախարարութեան պահպանութեան տակ եւ վերականգնուած:
Նահանգի Մշակոյթի եւ զբօսաշրջութեան վարչութեան պետ Ապտուլլահ Քըլըչ «Անատոլու»-ին պատմած է, որ եկեղեցւոյ որմնանկարները յայտնաբերուած են միայն 2007 թուականին, երբ եկեղեցւոյ մէջ վերականգնողական աշխատանքներ կատարուած են: Մինչ այդ որմնանկարները պատուած եղած են գաճով:
«Ամէն տարի հազարաւոր մարդիկ կու գան՝ այս որմնանկարները տեսնելու: Նման որմնանկարներ ամբողջ Քարամանի մէջ` միայն այս եկեղեցւոյ մէջ կան, որ կ’աւելցնէ եկեղեցւոյ կարեւորութիւնը»,- ըսած է ան:
Քըլըչ պատմած է, որ մինչեւ 2007 թուականը եկեղեցին որոշ ժամանակ օգտագործուած է որպէս բանտ: Իսկ այժմ եկեղեցւոյ մէջ տեղի կ’ունենան մշակութային տարբեր ձեռնարկներ:
