Հակառակ վարչակազմի փոփոխութեան՝ Լեռնային Ղարաբաղի մէջ կը վստահին Միացեալ Նահանգներու մէջ ձեւաւորուած ժողովրդավարութեան աւանդոյթներուն: Այս մասին, ըստ «Ամերիկայի Ձայն»-ին, ըսած է Ղարաբաղի վարչապետ Արայիկ Յարութիւնեան։
«Մենք համոզուած ենք, որ ամերիկեան ձեւաւորուած աւանդոյթները կը յուշեն, որ ազգերու ինքնորոշումը կամ ժողովրդավարութիւնը աւելի կը գերադասուին եւ ընդհանուր առմամբ, խաղաղութիւնը աւելի կը գերադասուի»,- ընդգծած է Յարութիւնեան:
Վերջերս, ելոյթ ունենալով Ուաշինկթընի մէջ, ԱՄՆ-ի Քոնկրէսի հայ-ամերիկեան բարեկամութեան խումբին կողմէ կազմակերպուած ձեռնարկին, վարչապետ Յարութիւնեան ընդգծած է, որ ղարաբաղեան հակամարտութեան հարցով Միացեալ Նահանգները միշտ փորձած է հանդէս գալ մեկնելով տարածքային ամբողջականութեան եւ ազգերու ինքնորոշման սկզբունքներէն.
«Մեր սպասելիքը այն է, որ շարունակեն այն, ինչ անոնք ունեցած են վերջին 20 տարիներուն ընթացքին` առանց կտրուկ արմատական փոփոխութեան»:
Մեկնաբանելով ղարաբաղեան կողմին մօտեցումները` Քոլորատոյի համալսարանի վերլուծաբան Ճոն Օլոկլինը յիշեցուցած է, որ ատոնց անհրաժեշտ է մօտենալ ամենայն լրջութեամբ` տեւական խաղաղութեան հասնելու համար. «Այնտեղ ապրող մարդիկ ունին ձեւաւորուած մօտեցումներ եւ անոնց անտեսումը շատ մեծ սխալ պիտի ըլլայ»:
Վիրժինիայի ճարտարագիտական համալսարանի փորձագէտ Ժերարտ Թոլի կարծիքով, ղարաբաղեան խնդիրին կարգաւորումը կրնայ քննարկուիլ աւելի լայն շրջանակով. «Անհրաժեշտ է Եւրոպական անվտանգութեան ճարտարապետութեան համապարփակ քննարկում: Եւ շարք մը հակամարտութիւններ Եւրոպայի մէջ` Ղրիմը, Մերձտնեսթրը, Վրաստանի տարածքի խնդիրները եւ Լեռնային Ղարաբաղը, կրնան իսկապէս կարգաւորուիլ»:
Յիշեցնենք, որ Ազրպէյճանը կը մեղադրէ հայկական կողմը ոչ կառուցողական դիրքորոշման եւ իրական փոխզիջման բացակայութեան մէջ, եւ կը նշէ, որ ղարաբաղեան գօտիին վրայ բախումները հայկական կողմի դիրքորոշման հետեւանքն են: Արայիկ Յարութիւնեան, այս առիթով նշած է, որ յառաջիկայի բանակցութիւններէն՝ Ղարաբաղի մէջ չեն ակնկալեր լուրջ յառաջընթաց: Ուստի, չեն տեսներ նաեւ խաղաղարար ուժերու տեղակայման կարիք.
«Քանի որ չկան բանակցութիւններ, նաեւ այդ գործօնը կը բացառուի: Եթէ չկայ որեւէ յառաջընթաց, խաղաղապահ ուժերուն դերն ալ կը դառնայ ոչ էական»,- նշած է Արցախի Հանրապետութեան վարչապետը:
Նախորդ շաբաթ Համպուրկի մէջ ԵԱՀԿ Մինսկի խումբի համանախագահ երկիրներու արտաքին գործոց նախարարները կոչ ըրած էին ղարաբաղեան հակամարտութեան կողմերու ղեկավարներուն՝ «ճկունութիւն ցուցաբերելու եւ վերադառնալու բանակցային սեղանի շուրջ»:
