Երկուշաբթի, 26. 02. 2024

spot_img

Ֆրանչիսկոս Պապը Այցելելով Խոր Վիրապի Վանքը Աւարտեց Իր Հայաստան Ուխտագնացութիւնը

Հռոմի Սրբազան Քահանայապետ Նորին Սրբութիւն Ֆրանչիսկոս Պապի Հայաստան այցի վերջին հանգրուանը Խոր Վիրապի պատմական վանքն էր:

26 Յունիսին Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսն ու Հռոմի Սրբազան Քահանայապետը, պատուիրակութիւններու  ուղեկցութեամբ այցելեցին Խոր Վիրապ, ուր անոնց դիմաւորեցին Մայր Աթոռի Վանորէից տեսուչ Գերաշնորհ Տ. Արտակ եպս. Տիգրանեանը, Հայ Եկեղեցւոյ եպիսկոպոսները եւ Վանորէից տեսչութեան մէջ սպասաւորող հոգեւորականները:

Երկու Հովուապետերը թափօրով առաջնորդուեցան դէպի Խոր Վիրապի վանքի շրջափակը, ուր  երկու Հովուապետերը մուտք գործեցին Ս. Գրիգոր Լուսաւորիչ մատուռը, ուր Ամենայն Հայոց Կաթողիկոսը եւ Հռոմի Պապը գուբէն հանուած կենսապարգեւ լոյսով վառեցին իրենց մոմերը։

Անկէ ետք նոյն այդ լոյսով, Ս. Աստուածածին եկեղեցւոյ մէջ անոնք վառեցին այցի առիթով Ֆրանչիսկոս Պապի կողմէ Խոր Վիրապի վանքին ընծայուած կանթեղը:

Ապա Գարեգին Բ. Ամենայն Հայոց Կաթողիկոսը եւ Հռոմի Սրբազան Քահանայապետ Ֆրանչիսկոս Պապը, հայերէն եւ իտալերէն լեզուներով խաղաղութեան համար աղօթքներ կատարեցին:

Այս ընթացքին Գէորգեան հոգեւոր ճեմարանի եւ Վազգէնեան հոգեւոր դպրանոցի երգչախումբերու կողմէ կատարուեցաւ՝ համաքրիստոնէական սուրբ եւ Հայ Եկեղեցւոյ երկրորդ Լուսաւորիչ՝ Ս. Գրիգորի նուիրուած «Լերինք Ամենայն» հոգեպարար շարականը:

Արարողութիւնը եզրափակուեցաւ միասնական Տէրունական աղօթքով:

aghavni

Վերջաւորութեան  Ամենայն Հայոց Հայրապետը եւ  Հռոմի Սրբազան Քահանայապետը առաջնորդուեցան դէպի սուրբ գրային Արարատ լեռը նայող բարձրահարթակը, ուրկէ եւ ի նշան խաղաղութեան, հայ-թրքական փակ սահմանի ուղղութեամբ արձակուեցան երկու աղաւնիներ:

Վանք այցելութենէն ետք «Զուարթնոց» միջազգային օդակայանի մէջ տեղի ունեցաւ հրաժեշտի պաշտօնական արարողութիւն, ուր Պապին ողջերթ մաղթեցին Ամենայն Հայոց Կաթողիկոս Գարեգին Բ-ը, Հայաստանի նախագահ Սերժ Սարգսեանն ու տիկինը եւ պաշտօնական անձինք, որմէ ետք Ֆրանչիսկոս Պապը աւարտելով իր այցը առաջին քրիստոնեայ երկիր Հայաստան, վերադարձաւ Վատիկան:

 

Հայրապետական Սուրբ Պատարագ Մայր Աթոռ Սուրբ Էջմիածնի Մէջ

26 Յունիսին, համայն հայութեան հոգեւոր կեդրոն Մայր Աթոռ Սուրբ Էջմիածնի Ս. Տրդատի Բաց խորանի վրայ Սուրբ Պատարագ մատուցեց Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը` աղօթական ներկայութեամբ Հռոմէակաթոլիկ Եկեղեցւոյ առաջնորդ Նորին Սրբութիւն Ֆրանչիսկոս Պապի:

Հայրապետական Պատարագին ներկայ էին Հայաստանի Հանրապետութեան Նախագահ Սերժ Սարգսեանը եւ առաջին տիկին Ռիթա Սարգսեանը, ՀՀ ԱԺ նախագահ Գալուստ Սահակեանը, ՀՀ վարչապետ Յովիկ Աբրահամեանը, Հայաստանեայց Առաքելական Սուրբ Եկեղեցւոյ թեմակալ առաջնորդներ, Գերագոյն հոգեւոր խորհուրդի անդամներ, Հայկական Բարեգործական Ընդհանուր Միութեան նախագահ Պերճ Սեդրակեանը, Մայր Աթոռ Ս. Էջմիածնի բարերարներ, աշխարհասփիւռ թեմերու պատուիրակներ, հասարակական, մշակութային գործիչներ, դիւանագիտական առաքելութիւններու, միջազգային կազմակերպութիւններու ներկայացուցիչներ, Հայաստանէն եւ Սփիւռքէն հայոց հոգեւոր կեդրոն ժամանած բազմաթիւ ուխտաւորներ:

Արարողութիւնը սկսաւ հայրապետական հանդիսաւոր եւ խաչվառազարդ թափօրով, որով Ամենայն Հայոց Կաթողիկոսը եւ Հռոմի Սրբազան Քահանայապետ Ֆրանչիսկոս Պապը, ուղեկցութեամբ Հայ եւ Կաթոլիկ Եկեղեցիներու հոգեւորականներէ կազմուած հանդիսաւոր թափօրին, Մայր Տաճարի աւետաբեր ղօղանջներու եւ «Խորհուրդ խորին» հոգեպարար շարականի երգեցողութեան ներքոյ, ամպհովանիով առաջնորդուեցան Ս. Տրդատի բաց խորան, ուր Գարեգին Բ Վեհափառ Հայրապետը Ս. Պատարագ մատուցեց:

Հայրապետական ամպհովանին կը կրէին Պուլկարիոյ հայոց թեմի առաջնորդ Հոգեշնորհ Տ. Իսահակ վարդապետ Պօղոսեանը, Գեղարքունիքի թեմի առաջնորդական տեղապահ Հոգեշնորհ Տ. Կիրակոս վարդապետ Դաւթեանը, Մեծի Տանն Կիլիկիոյ Կաթողիկոսութեան ներկայացուցիչներ՝ Արաբական Միացեալ Էմիրութիւններու եւ Քաթարի թեմի Կաթողիկոսական Փոխանորդ Հոգեշնորհ Տ. Մեսրոպ ծայրագոյն վարդապետ Սարգիսեանը եւ Անթիլիասի Դպրեվանքի տեսուչ Հոգեշնորհ Տ. Թորգոմ ծայրագոյն վարդապետ Տօնոյեանը։

Ս. Պատարագի ընթացքին Ամենայն Հայոց Կաթողիկոսին` որպէս առընթերականներ կը սպասարկէին ԱՄՆ Հայոց Արեւմտեան թեմի առաջնորդ Գերաշնորհ Տ. Յովնան արքեպիսկոպոս Տէրտէրեանն ու Դամասկոսի հայոց թեմի առաջնորդ Գերաշնորհ Տ. Արմաշ եպիսկոպոս Նալպանտեանը:

Ս. Պատարագի ընթացքին երկու Հովուապետերը միմեանց ողջոյն տուին, ապա Գարեգին Բ Ամենայն Հայոց Կաթողիկոսը օրուայ կապակցութեամբ իր պատգամը յղեց համայն հայ ժողովուրդին եւ ներկաներուն:

« Ձերդ Սրբութիւն՝ սիրեցեալ եղբայր ի Քրիստոս,

Մեծարգոյ Նախագահ Հայաստանի Հանրապետութեան,

Հոգեւոր եղբայրներ եւ բարեպաշտ ժողովուրդ,

Առ Աստուած փառաբանութեան օրեր են Սուրբ Էջմիածնի մէջ` հոգեւոր բերկրանքի եւ համատեղ աղօթքի առատութեամբ: Այսօր սուրբ Պատարագի արարողութեան համախմբուած ենք՝ աղօթակցութեամբ Հռոմի Սրբազան Քահանայապետ, Մեր սիրեցեալ եղբայր Ֆրանչիսկոս Պապի:

Խորհրդանշական  է, որ սուրբ եւ անմահ այս Պատարագին որպէս ընթերցուած հնչեց հացի բազմացման սուրբգրական պատմութիւնը: Աւետարանիչը կը պատմէ, որ երբ Յիսուս առանձնացաւ, ժողովուրդի բազմութիւնը իմանալով այս մասին, գնաց Անոր ետեւէն: Եւ երբ Տէրը տեսաւ հաւաքուած բազմութիւնը, գթաց անոնց եւ բժշկեց հիւանդները: Երեկոյեան աշակերտները խնդրեցին Տիրոջմէ ժողովուրդին ազատ արձակել, որպէսզի ուտելիք գտնեն: Քրիստոս անոնց պատուիրեց մարդկանց կերակրել: Սակաւ էր սակայն ուտելիքը, եւ Տէրը օրհնեց զայն, ու հրաշքով առատացած հացը բաւարար դարձաւ, որպէսզի առաքեալները կերակրեն հաւաքուած ամբողջ բազմութիւնը:

Այս հրաշագործութիւնը աստուածային շնորհներով, տէրունաւանդ ուսուցումներով քաղցեալ հոգիները յագեցնելու, նաեւ՝ գթասրտութեամբ կարիքաւորներուն օգնելու խորհուրդ ունի, որ դարձաւ կարեւոր ծառայութիւններէն՝ Քրիստոսի Սուրբ Եկեղեցւոյ առաքելութեան: Տէրը կը յորդորէ Իր հետեւորդներուն հաւատքը կենդանի դարձնել գործերով, աղօթքին ու պաշտամունքին զուգակցել ողորմութիւնն ու գթասրտութիւնը, կարիքի ու նեղութիւններու ամոքումը, որոնցմով առաքեալի խօսքի համաձայն՝ գործակից ենք Աստծուն (Ա Կորնթ. Գ 9): Այս տեսիլքով Եկեղեցւոյ բազում մարգարէաշունչ հայրեր ու երանաշնորհ հայրապետներ, քաջ ու բարի հովիւներ, հաւատքի անթիւ վկաներ ու բարեպաշտ հաւատացեալներ, դարեր շարունակ Քրիստոսի Եկեղեցւոյ պատմութեան էջերը պատկերագրած են Աստծոյ խօսքի նուիրեալ քարոզչութեամբ եւ ողորմածութեան ու խնամատարութեան մեծագործութիւններով, որպէսզի մարդիկ զօրանան հաւատքով եւ հաւատքի գործերով վկայեն Աստծոյ ներկայութիւնը մարդկութեան կեանքի մէջ:

Այսօր առ Աստուած հաւատքը փորձութեան կ’ենթարկուի, եւ մարդկային հոգիները կը կարծրանան ինչպէս նեղութիւններու եւ դժուարութիւններու մէջ, այնպէս եւ հարստութեան ու շքեղութեան, երբ անհաղորդ են հանապազօրեայ հացի կարօտեալ, ցաւի ու տառապանքի մէջ ապրող մարդոց հոգերուն: Հաւատքը փորձութեան կ’ենթարկուի ծայրայեղական եւ այլ գաղափարախօսութիւններով, այլատեացութեամբ, մոլուցքներով, գայթակղութիւններով, անձնակեդրոն շահերով: Կ’ուժգնանան աշխարհիկացման ընթացքները, կը խաթարուին հոգեւոր-բարոյական ընկալումներն ու արժէքները, կը վտանգուի ընտանիքի աստուածահաստատ կառոյցը: Փորձել կառուցել աշխարհ առանց Աստծոյ, աղաւաղել աստուածադիր օրէնքն ու պատուիրանները, այս է ժամանակակից կեանքի չարիքի արմատը, որ առաջ կը բերէ տնտեսական, քաղաքական, ընկերային, բնապահպանական ու տարաբնոյթ խնդիրներ, որոնք օրէցօր կը խորանան՝ սպառնալով մարդկութեան բնականոն կեանքին:

Այսուհանդերձ աշխարհը չի դադրիր ըլլալ կեդրոնը աստուածային սիրոյ եւ խնամատարութեան: Տէրը կը շարունակէ ձայնել. «Ես եմ կենաց հացը, ով դէպի Ինծի գայ, քաղց չի զգար, եւ ով Ինծի հաւատայ, երբեք չի ծարաւնար» (Յովհ. Զ 35): Տիրոջ քաղցր վարդապետութիւնը ճաշակածը կը խոնարհի ինկածին բարձրացնելու, մարդոց սրտերու մէջ յոյսն ու հաւատքը առատացնելու, հացի բազմացման հրաշքը կրկնելու՝ աջակցելով ու մխիթարելով կարիքաւորներուն, հիւանդներուն ու վշտացեալներուն: Տէրունապատուէր այս ընթացքներով, հոգեւոր եւ բարոյական արժէքները կենսագործելով է, որ բարին պիտի զօրանայ աշխարհի վրայ եւ պիտի յաղթահարուին արդի մարտահրաւէրները: Բոլոր բարի գործերը կ’արտայայտեն աստուածային խնամքը մարդկութեան ու աշխարհի հանդէպ՝ ըստ Տիրոջ խօսքի՝ «արքայութիւնը ներսը, ձեր մէջ է» (Ղուկ. ԺԷ 21), որու հաստատման համար Եկեղեցիները իրենց սպասաւորութիւնը կ’ընեն աշխարհի վրայ:

Սիրելիներ, այս օրերուն Մեր հոգեւոր եղբօր՝ Ֆրանչիսկոս Պապի հետ միասնական այցերով ու աղօթքներով վերստին հաստատեցինք, որ Քրիստոսի Սուրբ Եկեղեցին մէկ է աշխարհի վրայ, Քրիստոսի Աւետարանի տարածման, արարչագործութեան հանդէպ խնամքի, համընդհանուր խնդիրները դիմագրաւելու, Աստծոյ ստեղծագործութեան փառքն ու պսակը հանդիսացող մարդու փրկութեան կենսական առաքելութեամբ: Քրիստոսի Եկեղեցւոյ առաքելութեան անբաժանելի մասն է ազգերու եւ ժողովուրդներու միջեւ ամրապնդումը՝ համերաշխութեան, եղբայրութեան ու գործակցութեան, որու վկայութիւնն է այսօր սրբազան այս Պատարագին մասնակցութիւնը Հայաստանի մէջ ազգային փոքրամասնութիւններու ներկայացուցիչներուն՝ ասորիներու, պելառուսերու, յոյներու, վրացիներու, հրեաներու, եզտիներու, քիւրտերու, գերմանացիներու, լեհերու, ռուսերու եւ ուքրանացիներու, որոնք մեր ժողովուրդի հետ եղբայրական համակեցութեան մէջ իրենց նպաստը կը բերեն մեր երկրի զօրացման ու հասարակական կեանքի առաջընթացին:

Շնորհաշատ այս օրը գոհունակութիւն է Մեզի համար վերստին յայտնել Մեր շնորհակալութիւնը Ֆրանչիսկոս Պապին՝ եղբայրական իր այցի առիթով: Մենք եւ մեր ժողովուրդը միշտ պիտի աղօթենք Ձեզ համար, սիրեցեալ եղբայր, եւ ի սէր մարդկութեան բարօրութեան ու խաղաղ կեանքի եւ Քրիստոսի Սուրբ Եկեղեցւոյ պայծառութեան Ձեր ջանքերու համար: Թող Տէրը պահէ Ձեզ կորովաշատ, օրհնէ ու հաստատուն պահպանէ մեր Եկեղեցիները՝ սիրոյ, միութեան եւ գործակցութեան մէջ ու պարգեւէ եղբայրութեան վկայութեան նորանոր առիթներ: Ձեր ամենօրեայ աղօթքներու մէջ յիշեցէք հայ ժողովուրդին, հայոց երկիրն ու Հայ Եկեղեցին, Մայր Աթոռ Սուրբ Էջմիածինը:

Աղօթական հոգիով կը հայցենք Բարձրեալն Աստծոյ ամենախնամ Սուրբ Աջի պահպանութիւնն ու զօրակցութիւնը պատերազմներէ ու ահաբեկչութիւններէ տուժածներուն, սովի, աղքատութեան եւ փորձութիւններու մէջ գտնուողներուն: Կը հայցենք մեր Տիրոջ ամենաառատ շնորհները մեր կեանքին եւ համայն աշխարհին: Ամէն»:

Այնուհետեւ ողջոյնի խօսքով ներկաներուն դիմեց Ֆրանչիոսկոս Պապը:

«Ձերդ Սրբութիւն, յոյժ սիրելի Եպիսկոպոսներ,

Սիրելի եղբայրներ եւ քոյրեր,

Այս յոյժ ցանկալի եւ ինծի համար արդէն անմոռանալի այցի գագաթնակէտին, կ’ուզեմ Տիրոջ բարձրացնել իմ շնորհակալութիւնը, միացնելով զայն այս սեղանէն բարձրացած փառաբանական եւ գոհաբանական մեծ աղօթքին: Այս օրերուն Ձերդ Սրբութիւնը իր տան դուռերը բացաւ ինծի, եւ զգացինք թէ «ինչ գեղեցիկ եւ ինչքան քաղցր է, որ եղբայրները միասին բնակին» (Սղ 133,1): Հանդիպեցանք, եղբայրաբար ողջագուրուեցանք, միասին աղօթեցինք, կիսեցինք ընծաները, յոյսերն ու մտահոգութիւնները, Քրիստոսի Եկեղեցւոյ՝ որուն սիրտի միաձայն զարկերը կը լսենք, եւ հաւատացած ենք ու կը զգանք թէ մէկ է: «Մէ՛կ մարմին եւ մէ՛կ հոգի, ինչպէս որ մէ՛կ է ձեր յոյսը […]. մէ՛կ Տէր, մէ՛կ հաւատ, մէ՛կ մկրտութիւն: Մէ՛կ Աստուած եւ Հայր բոլորին, որ վեր է բոլորէն, բոլորի հետ եւ մեր բոլորի մէջ» (Եփ 4,4-6). իրօք կրնանք ուրախութեամբ մերը դարձնել Պօղոս առաքեալի այս խօսքերը: Նոյն սուրբ Առաքեալներու յիշատակին հանդիպեցանք: Սուրբ Բարթողիմէոս եւ Թադէոս, որ առաջին անգամ քարոզեցին Աւետարանը այս աշխարհի մէջ, եւ սուրբ Պետրոսն ու Պօղոսը, որ Հռոմի մէջ իրենց կեանքը զոհեցին Տիրոջ համար, մինչ կը թագաւորեն երկինքի մէջ Քրիստոսի հետ՝ վստահաբար կ’ուրախանան տեսնելով մեր սէրն ու ժրաջան ձգտումը՝ ամբողջական հաղորդութեան: Այս բոլորի համար շնորհակալ եմ Տիրոջմէ, ձեզի համար եւ ձեզի հետ. Փառք Աստծոյ:

Այս Սուրբ Պատարագի ընթացքին, հանդիսաւոր Երեքսրբեանը բարձրացաւ երկինք, օրհնաբանելով Աստծոյ սրբութիւնը. Ամենաբարձրեալի օրհնութիւնը առատօրէն իջնէ երկիր, Աստուածամօր, մեծ սուրբերու եւ վարդապետներու, մարտիրոսներու եւ յատկապէս բազմաթիւ նահատակներու բարեխօսութեամբ, որ անցած տարի այս վայրի մէջ սրբադասեցիք: «Միածինը որ այստեղ իջաւ» օրհնէ մեր ճանապարհը: Սուրբ Հոգին բոլոր հաւատացեալներուն պարգեւէ մէկ սիրտ, մէկ հոգի. մեզի այցելէ միութեան մէջ վերահաստատելու: Այս պատճառով կ’ուզեմ կրկին կանչել Անոր, իմը դարձնելով սքանչելի խօսքերէն ոմանք որ ձեր Ծէսի մէջ մուտք գործած են: Եկուր, Հոգի, Դուն «որ բարեխօս ես մեզի համար, անմռունչ հեծութիւններով ողորմած Հօր մօտ, որ սուրբերուն կը պահես եւ մեղաւորներուն կը մաքրես», թող իջնէ մեր վրայ քու սիրոյ եւ միութեան կրակը, եւ «այս կրակով հալին մեր գայթակղութեան պատճառները» (հմմտ. Գրիգոր Նարեկացի, Մատեան ողբերգութեան, 33,5), նախեւառաջ միութեան պակասը Քրիստոսի աշակերտներու միջեւ:

Հայոց Եկեղեցին խաղաղութեամբ ընթանայ եւ մեր միջեւ խաղաղութիւնը կատարեալ ըլլայ: Բոլորի մէջ ծնի միութեան հզօր ցանկութիւն, այնպիսի միութեան, որ պէտք չէ ըլլայ «ո՛չ ենթարկութիւն մէկը միւսին, ո՛չ կլանում, այլ առաւել ընկալում բոլոր շնորհներուն որ Աստուած տուած է իւրաքանչիւրին՝ ամբողջ աշխարհին յայտնելու համար փրկագործութեան մեծ խորհուրդը, իրագործուած Տէր Քրիստոսէն, Սուրբ Հոգիի շնորհիւ» (Սրբազան Հօր խօսքեր Աստուածային Ծիսակատարութեան ընթացքին, Սուրբ Գէորգ Պատրիարքական Եկեղեցի): Այս սրբատեղիէն կրկին սփռուի ճաճանչափայլ լոյսը. այս երկրի լուսաւորիչին՝ ձեր Աւետարանի Հօր՝ Սուրբ Գրիգորի հաւատի լոյսին միանայ սիրոյ լոյսը՝ որ կը ներէ եւ կը հաշտուի:

Ինչպէս Առաքեալները Զատկուան առաւօտուն, տարակոյսներով եւ անվստահութիւններով հանդերձ, վազեցին յարութեան վայրը, նոր յոյսի երջանիկ արեւագալէն դիւթուած (հմմտ. Հվ 20,3-4), նոյնպէս մենք եւս, այս սուրբ Կիրակին, կը հետեւինք Աստծոյ կանչին՝ կատարեալ միութեան եւ կ’արագացնենք մեր քայլերը:

Իսկ այժմ, Սրբութիւն, Աստծոյ անունով, կը խնդրեմ որ Ինծի օրհնէք, օրհնեցէք ինծի եւ Կաթողիկէ Եկեղեցին, օրհնեցէք մեր այս ընթացքը՝ դէպի կատարեալ միութիւն»:

Ս. Պատարագի աւարտին Ամենայն Հայոց Կաթողիկոսը եւ Հռոմի Սրբազան Քահանայապետը միասին օրհնեցին ներկայ ուխտաւոր ժողովրդին:

 

Մայր Աթոռ Սուրբ Էջմիածնի Մէջ Ստորագրուեցաւ Համատեղ Հռչակագիր

Յունիս 26-ին Մայր Աթոռ Սուրբ Էջմիածնի Վեհարանի գահասրահի մէջ տեղի ունեցաւ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի եւ Հռոմի Սրբազան Քահանայապետ Ֆրանչիսկոս Պապի համատեղ հռչակագրի ստորագրման արարողութիւնը: (Հռչակագիրը կը հրատարակենք առանցին:

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին