Ինչպէս ամէն տարի, ՀՀ Սփիւռքի նախարարութիւնը այս տարի եւս կը կազմակերպէ գիտաժողովներ, որոնք առաւելաբար կը միտին Հայաստան-Սփիւռք կապերու ամրապնդման, Սփիւռքի ներուժը համակարգելու եւ Հայաստանի զարգացման նպաստելու։
ՀՀ Սփիւռքի նախարարութեան ու Երեւանի պետական համալսարանի Հայագիտական հետազօտութիւններու հիմնարկի նախաձեռնութեամբ, ՀՀ Կրթութեան եւ Գիտութեան Նախարարութեան Գիտութեան պետական կոմիտէի գործակցութեամբ, 2016թ. Օգոստոս 25-26 պիտի կազմակերպուի «Հայկական աշխարհը համացանցէն ներս» խորագիրով գիտագործնական միջազգային գիտաժողով:
Գիտաժողովին պիտի մասնակցին՝ ՀՀ, ԼՂՀ եւ Սփիւռքի գիտակրթական, մշակութային, լրատուական, գրադարանային ծիրին առնչուող կառոյցներու, կազմակերպութիւններու համացանցային հարթակներուն ներկայացուած կայքերու, սընկերային ցանցերու եւ այլ պատասխանատու ներկայացուցիչներ։
Մասնակցութեան դիմումները կ’ընդունուին մինչեւ սոյն թուականի Յունիս 15:
Գիտաժողովը պիտի ընթանայ երկու ուղղութիւններով.
- «Հայկական աշխարհըհամացանցի գիտակրթական հարթակին»:
- «Տեղեկատուական անվտանգութեան մարտահրաւէրները համացանցէն ներս»:
Գիտաժողովի հիմնական գործածական լեզուներն են հայերէնը, ռուսերէնը եւ անգլերէնը:
Գիտաժողովի ամփոփումներն ու զեկոյցները լոյս պիտի տեսնեն առանձին ժողովածուի տեսքով:
2015 թուականին ՀՀ Սփիւռքի նախարարութեան նախաձեռնութեամբ կազմակերպուած յիշարժան գիտաժողովներէն են՝ «Մերձաւոր Արեւելքի հայ հոգեւորականութեան առաքելութիւնը Հայոց Ցեղասպանութեան տարիներուն», «Հայ կինը Հայոց Ցեղասպանութեան տարիներուն եւ յետոյ», «Ընդդէմ ցեղասպանութեան յանցագործութեան» եւ այլն։
