Երեքշաբթի, 23. 04. 2024

spot_img

Կարօ Լուկաս (Ղուկասեան)

Պատրաստեց՝ ՌՈՒԲԻՆԱ ՕՀԱՆԵԱՆ

 Կարօ Լուկաս (Ղուկասեան) իրանահայ անուանի գիտահետազօտող եւ ճարտարագէտ՝ յայտնի էր որպես «Իրանի ռոպոթաթեքնիքի հայր»։

Կարօ Լուկաս ծնած է 1949ին Սպահան: Երկրորդականէ ետք բարձրագոյն ուսումը շարունակած է Թեհրանի Պետական համալսարանի Թեքնիքական գիտութիւններու բաժանմունքի Էլեկտրական ճարտագիտութեան ճիւղին մէջ, 1973ին աւարտելով մագիստրոսական աստիճանը։ Մասնագիտացման համար մեկնած է ԱՄՆ: 1976ին Պըրքլի համալսարանի Էլեկտրական եւ համակարգչային գիտութիւններու բաժինէն կը ստանայ թեկնածուական՝ համակարգերու հսկողութիւն թեքումով։ Ապա վերադարնալով Իրան, 30 տարիներ դասաւանդած եւ գիտահետազօտական աշխատանքներ ղեկավարած է Թեհրանի համալսարանի իր ուսանած Թեքնիքական գիտութիւններու բաժանմունքի մէջ։ 2006ին Իրանի ճարտարագիտութեան ասպարէզին մէջ ճանաչցուած է որպէս «Մնայուն դէմք»։Մահացած է 2010ին Թեհրանի մէջ՝ յետ կարճատեւ հիւանդութեան:

Կարօ Լուկաս 1986-1988ին ղեկավարած է Թեհրանի համալսարանի Թեքնիքական գիտութիւններու բաժանմունքի Էլեկտրականութեան բաժինը, որու ընթացքին նաեւ հիմնադրած է համալսարանի Ուշիմ համակարգերու հսկողութեան կեդրոնը։ 1993-1997ին տնօրինած է Իրանի Հիմնարար գիտութիւններու կեդրոնի (IPM) աշխատանքները։

Լուկաս Իտալիոյ Թրիեսթէ քաղաքի Տեսական ֆիզիքայի միջազգային կեդրոնի (International Center for Theoretical Physics) եւ Ծագումնաբանական ճարտարագիտութեան եւ կենսաթեքնոլոժիի միջազգային կեդրոնի (International Center for Genetic Engineering and Biotechnology) գիտահետազօտող, Կիրառական Մաթեմաթիկայի ինսթիթութի անդամ, Չինական Գիտութիւններու Ակադեմիայի անդամ, Հարբինի էլեկտրական թեքնոլոժիի ինսթիթութի (Harbin Institute of Electrical Technology) գիտահետազօտող, Օնթարիոյի հետազօտական եւ արտադրական ընկերութեան գիտահետազօտական գործակից (research associate), եւ Պըրքլի համալսարանի Էլեկտրական հետազօտութիւններու փորձասենեակի (լապորաթուարի) (Electronic Research Laboratory) գիտահետազօտական գործակից եղած է։

Լուկասի գիտական հետաքրքրութիւններու շարքին մէջ եղած է կենսաբանական հաշուարկումը, հաշուողական բանականութիւնը, անորոշ համակարգերը, բանական վերահսկումը (intelligent control), նէյրոնային ցանցերը (neural networks), բազմագործակալ համակարգերը (Multiagent Systems), տուեալներու ականումը (Data Mining), ֆինանսական մոտելաւորումը եւ գիտելիքներու կառավարումը:

Կարօ Լուկաս հրատարակած է աւելի քան 1200 գիտահետազօտական յօդուածներ, միջազգային գիտաժողովներու մէջ աւելի քան 200 դասախօսութիւններ ներկայացուցած է, 20 միջազգային գիտական պարբերականներու խմբագրական կազմերու անդամ եղած է, 8 գիրքեր հեղինակած է եւ 39 գիտական խմբագրուած հաւաքածոներու համահեղինակ է։

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին