Ատրպէյճանի արտաքին գործոց նախարար Էլմար Մամետեարով այսօր կայացած մամուլի ասուլիսի ընթացքին յայտարարած է, որ Հայաստանի արտաքին գործոց նախարարին հետ հանդիպումը պիտի կայանայ Սեպտեմբեր 24-25-ին` Նիւ Եորքի մէջ:
ԱՓԱ գործակալութեան փոխանցմամբ` Մամետեարով յայտնած է, որ ԵԱՀԿ Մինսկի խումբի համանախագահները նախ առանձին պիտի հանդիպին նախարարներէն իւրաքանչիւրին հետ, ապա պիտի կայանայ համատեղ հանդիպումը:
«Վերջին շրջանին յաճախակի դարձած են հրադադարի խախտման դէպքերը: Յուսով եմ` այդ հարցով պայմանաւորուած` արդիւնք ձեռք կը բերուի: Այդ առումով Ռուսիան ամրապնդած է դիւանագիտութիւնը: Սերկէյ Լաւրով այցելած է Ատրպէյճան, իսկ ես` Մոսկուա: Սակայն արդիւնքի հասնելու համար մենք պէտք է աշխատինք: Մենք պէտք է համաձայնեցնենք որոշ հարցեր: Ռուսիա կը շարունակէ աջակցիլ ԵԱՀԿ Մինսկի խումբին: Պիտի փորձենք արդիւնքի հասնիլ, սակայն նախապէս որեւէ բան ըսելը դժուար է»,- ըսած է ան:
