Երրորդ տարին ըլլալով Հայաստանի մէջ կ’իրականացուի Վիքթոր Համբարձումեանի անուան մրցանակաբաշխութիւնը: Այս տարի մրցանակին արժանացած է երեք գիտնական: Անոնցմէ մէկը Գերմանիան ու Իռլանտան ներկայացնող հայ աստղաբնագէտ Ֆելիքս Ահարոնեանն է, որ յառաջադրուած է Իտալիոյ Լինչէի ազգային ակադեմիային կողմէ` “Բարձր ուժանիւթերու աստղաբնագիտութեան տիեզերական արագացուցիչներու բնագիտութեան ոլորտին մէջ ակնառու ներդրման եւ Չերենգովի դիտակներու իրացուցական (stereoscopic) համակարգի մշակման” յառաջատար դերին համար: Երկրորդ մրցանակը կիսած են Ռուսաստանը ներկայացնող Իգոր Գարաչենցեւը եւ ԱՄՆ-ն ներկայացնող Պլեթ Թալին` “Տեղական տիեզերքի տիեզերաբանութեան մէջ հիմնարար ներդրման համար”:
Ըստ Tert.am-ի՝ լրագրողներու հետ հանդիպման ընթացքին, աստղաբնագէտ Ֆելիքս Ահարոնեանը պատասխանելով հարցին, թէ ուր աւելի դիւրին է աշխատիլ` Հայաստանի՞, թէ Իտալիոյ մէջ, ըսած է. “Հնարաւորութիւնները այսօր աւելի շատ են, քան առաջ էր: Նախկինում` Սովետական Միութեան օրօք, յօդուածներ տպւում էր միայն թոյլտուութեան դէպքում, թուղթ չկար, իսկ այսօր տարբերութիւն չկայ, թէ որտեղ ես, ինտերնետով նոյնիսկ փողոցում կարող ես գրել ու քեզ ոչինչ չի խանգարի: Ուղղակի հարցն այն է, որ այսօր հայաստանում երիտասարդ գիտնականները քիչ են, բայց ինչ-որ շարժում սկսւում է: Պարզապէս մարդիկ այստեղ ստիպած են այլ բաների մասին մտածել, քան գիտութեան, բայց եթէ յաղթահարուեն սոցիալական խնդիրները, ապա գիտական առումով մենք խնդիր չենք ունենայ”:
Ռուսաստանը ներկայացնող գիտնական Իգոր Գարաչենցեւը նշած է, որ ինքը եղած է Վիքթոր Համբարձումեանի ասպիրանտներէն մէկը: “Հայաստանի մէջ պաշտպանած եմ իմ ասպիրանտական աշխատանքը եւ ուրախ եմ, որ եղած եմ Վիքթոր Համբարձումեանի աշակերտը: 1975թ-ին երբ իմացանք, որ Հիւսիսային Կովկասի մէջ կը կառուցուի մեծ աստղադիտարան, տեղափոխուեցայ այնտեղ ու 40 տարի է կ’աշխատիմ այնտեղ”,- ըսած է ան:
Միւս մրցանակակիր Պրենթ Թալինը նշած է, որ իրեն համար մեծ պատիւ է արժանանալ այս մրցանակին, որովհետեւ Համբարձումեանի անունը յայտնի է ամբողջ աշխարհին: “Մենք պիտի շարունակենք համագործակցութիւնը Հայաստանի հետ, միայն համագործակցութեան պարագային է, որ կը ստեղծուին աշխարհի կարեւոր գիտական ձեռքբերումները”,- նշած է ան:
Նշենք, որ մրցանակը կը կազմէ 500 հազար տոլար, որ պէտք է կիսուի մրցանակակիրներուն միջեւ: Այսպիսով Ֆելիքս Ահարոնեանին տրուած է 250 հազար տոլար, իսկ միւս 250 հազար տոլարը կիսուած է Ռուսաստանն եւ ԱՄՆ-ն ներկայացնող գիտնականներու միջեւ: Լրագրողներու հետ զրոյցի ընթացքին երեքն ալ նշած են, որ գումարը պիտի ներդրուի գիտութեան զարգացման գործին մէջ, մասնաւորապէս պիտի օգնեն, որ հայ երիտասարդ գիտնականները այցելեն այն աստղադիտարանները, ուր իրենք կ’աշխատին: Ֆելիքս Ահարոնեան նշած է, որ ինքը 50 հազար տոլար պիտի յատկացնէ ՀՀ Գիտութիւններու ազգային ակադեմիայի հիմնադրամին:
www.tert.am
